Saturday 11 June 2011

UMEED.....!!

Osay doctor say ye umeed nae thi . kitni asaani say oss nay keh dia tha "sorry beta but inn k pas ab zyada waqt nae hai , ham koshish pori kar rahay hain par inn k organs bari bari maflooj hoo rahay hain". 
wo sakht pareshan tha par na umeed nae. 
Bakwas kar raha hai ye doctor. military hospital k doctor wesay b afsar zyada hotay hain and doctor kam .
par ab main karu kia . agha khan lay jao , lekin suna hai agha khan ka death rate sab say zyada hai . itna bara hospital hai ye b . akhir koi tw doctor kaam ka hoo ga .
isi pareshani main oss nay pori raat kaat di . kabbi ICU k bed par letay howay apnay baap ko dekhta aur kabbi ghar par kisi achi khabar ka intezar kartay apni maa aur chotay bhai benhu k baray main sochta. oss ka baap umer k oss hisay main tha jis main wal-deen apnay bachu ko dunya ko fatah kartay howay dekhtay hain. Kameyabian tw oss nay b bht hasil kie thie ...aik k bd aik. osski khuwahish thi k dunya ko fatah kar k apnay baap k pairu mai dal day . Bachpan say aaj tak oss nay kaabi apni kisi kameeyabi par apnay baap say kuch na manga tha. Oss ka sab say bara inaam tw  khushi ko wo anso the jinhain har baar , har fatah k bd wo unn k chehray par dekhta tha. Bas yahi osay chahiye tha. har imtehan say pehlay wo apnay baap say dua  k liye kehta tha .Dono baap betay ka ajib rishta tha , osay apnay baap ki duao par umeed thi aur oss k baap ko osski mehnat par , aur khuda unn dono ko kabbi mayoos b na karta tha. baap betay k rishtay ka ye pul aksar kisi purani dosti k darya par banthay pul ki manind lagta tha,  bachpan say wo hameesh apnay baap ko DOST kehta aya tha.
"Nurse mai kuch der k liye ghar jaa raha hun , kapray wegara tabdeel kar k ata hun , inhain agr hosh ae tw plz meray number par call kar lije- ga".
fajr ki nazmaz parhnay k baad wo thori der apnay baap k sarhanay khara raha aur phir duty nurse say milnay k bd ghar ki taraf chal para . osay poori umeed thi k doctor bakwas kar raha hai . aesa kesay hoo skta hai . abi abu ki umer hi kia  hai . 50 saal , huh ..iss umer main tw log apni sari zindagi ki mehnat ka phal khatay hain . Unhain nay tw sirf mehnat ki hai , fasal paqq chuki hai aur phal khana unka haq hai .ALLAH na insaafi nae karta . Wo abi zinda rahay gay. osi pori umeed thi k osski graduation par wo zaror ae gay aur graduation main tw abi saal baki hai. Phr wo kesay ja sktay hain!

 Osay bed par letay kuch hi waqt howa tha k oska phone bol otha. 
beta jaldi say hospital ao , forun
khala jan kia howa hai ??
aur dosri taraf sy phone kutt gaya.

Oss nay sari zindagi umeedu k saharay hi tw ji thi . ….aur wo kabbi mayoss nae howa tha . wo unn logo main say tha jo hameesha iss baat par gehra yakeen rakhtay hain k umeed k saharay dunya qa-em hai .
Apnay baap ki purani Honda ko wo bhagata howa hospital puhancha.
‘kia howa ho ga, phr koi attack aya hoo ga aur ami nay ghabra kar koi tofan khara kar dia ho ga , ami k jazbat ko sambhalna ab mushkil hota ja raha hai, itni bar samjhaya hai unko k abu thek hoo jain gay bas thora sabar aur hoslay say kaam lain ….chotay behan bhai pehlay hi itnay pareshan hain oper say ye ami ki pareshani …’
Aesay pata nae kitnay hi unn gin^nat khayal oss k zehan k dareechu^n main ghoom rahay the. Car parking say emergency rm k ICU tak wo takreeban  100 meter race bhag kar puhancha
“itna tez agar iss dafa k sports day par bhaga hota tw silver k bajae shayd gold medal mil hi jata”.
reception par ruk kar ye sochtay howay  sans ko bahaal kia aur ICU main dakhil hoo gaya . ander dakhil hotay hi sedhay hath par pehla bed oss k baap ka hi tha jis k baray main wo aksar ye sochta tha k bed ka size roz ba roz bara hota jaa raha hai , wo ye mananay ko tayar na tha k 70 kilo k jis neem behosh jism ko staff nay aik maheena pehlay iss bed par dala tha , wo ab sukar kar mehaz chand kilo ka reh gaya tha . Bed…..wo tw be-jaan tha , wo bhala kesay bara hoo skta hai.
“Ya ALLAH”
Bas ye do lafz oss k mu say niklay , shayd aur b bht kuch nikalta lekin lafz , ehsasaat , jazbaat …sab kahin bikhar say gaye , kahin gum say ho gaye …
“Abdullah beta sabar karo bas ALLAH ko yahi manzoor tha ”
Ye shayd khala jan ki awaz hai , osay bas awazu ki pehchan thi …alfazu ki pehchan shayd wo thek say kar hi nae paa raha tha , kesay karta  ..itna kuch tha pehlay hi pehchananay k liye , bister par safai^d chadar main lipti koi laash , par ye tw abu ka bed tha ..tw abu kahan hai ..
“dr. say pochta hun”
Par zaban nay alfaz ka sath nae diya , ami ..wo wahan konay main kia kar rahi hain , shayd roo rahi hain aur wo shayd bari khala hain jo unko sahara day rahi hain .
“beta ghar jao , wahan sab akelay hain aur unhain sab say zyada iss waqt tmhari zarorat hai”
Ab ki bar wo awaz b na pehchan paya aur chup chap ghar ki taraf chal para , oska zehan b shayd apnay baap ki rooh k sath kisi aur aalam mai chala gaya tha ya shayd aalam-e-arwa mai iss faislay k khilaf koi muqada-ma karnay.
“kia waqai umeed par dunya qayan hai ”.
Iss say zyada wo kuch soch na saka . dekhnay walay kehtay hain k koi oss k anso  nae dekh paya , kia sara pani ander hi sookh gaya tha ?
Mahallay k kuch logo nay oss k ghar k bahir tent lagwa dia  aur logo ki line lag gai .
“beta sabar karo”
“hosla rakho ”
“ALLAH unko jannat mai jaga ata farmae”
Aur aesay hi bht say alfaaz jinhain wo pehchan nae paa raha tha. Osay bari kooft hoo rai thi . tent k beach main wo sir jhukae betha tha aur anay walay oss say bari bari taziat kar rahay the lekin oss k hoont shayd sill say gaye the aur alfaaz sab chotay par gaye the.
“kia mje dukh hai , tw phr mai roo kuon nae raha , ansoo kuo sath chor gaye hain”
Wo ghantu^n osi tent main betha yahi sochta raha , kon aya ..kon gaya …osay kuch yaad hi nae raha …shayd wo ye manany ko tayar na tha k umeed nay oss k ghar walu ka sath chor dia hai . oss ka baap aik lambi bemari sy sakht jhang lar raha tha , lekin himmat kabbi na hari thi aur baap ki yahi himmat poray ghar k liye umeed ki shamma thi .
“par ab kia hoo ga”
Wo ye sochta howa ghar k gate say ander dakhil howa tw oss ki behnai^n oss say lippat kar ronay lagien …chota bhai gate k sath aik purani kursi par sir jhukae betha tha aur oss ki maa apni behan say jan chura kar oss k pas ai , oss nay maa k ansoo saaf kiye tw anso^oo k oss paar ma ki ankhun mai osay ajib si roshni dikhai di …oss nay baari baari sab behn^u aur bhai k ans^o saaf kiye aur dilasa dia …or sab ki ankhu mai hi osay koi roshni ya shamma dikhai di .fajar ki azan moulvi barabar ki masjid say day raha tha , wo b namaz k liye chal para .
“han wo umeed ki shamma thi aur unn sab ki umeedain ab mj say wabasta hain , par meri ummedu^ ka sahara kon hoo ga ”
Gali k akhir main masjid k gate say ander dakhil honay say pehlay oss nay sir otha kar jab masjid k gate par likhi dua par ALLAH ka naam parha tw osski ankhu main b wo shamma roshan thi .







1 comment:

  1. u cannot make anyone senti..tmhri acting + tehreeron mai wo baat e nhi hai..rather wo kafiyat e nhi hai..looser!!:P:P:P

    ReplyDelete