Saturday, 24 December 2011

WIPER BOY ..!

(WRITTEN BY : MALIKA HAIDER)


Roz subha uski aankh maa ki cheekho pukar or baap ki laan taan sy khulti the.  Maa ghurbat ka rona roti or baap ghurbat ki isi sakhti ko maa pe apna zor-e-bazo azma k utarta, galiyon se sabko nashta karata or apne maile roomal ko kandhe pe daal k bakta jhakta aik kamray pe mushtamil makan se bahar nikal jata, or jate waqat teen k darwaze ko is zor se paktakh kar band karta k oski shidat se kachi enton se bani in chaar dewaron pe rakhi chat bhi sisak k reh jati.. Baap k jane k baad maa ki laan taan ka baja bajta. Woh or oske baqi 2 bhai or 2 behen sookhi rooti ko chabaeye baghair nigalte or apne apne wind screen wipers utha k is umeed k sath nikal khare hote k shayad aj laan taan ki jaga kabhi kabhi mil jane wale sikoon ki tadaad kal se zyada ho.
Kali chamakti hui ankhon wala, sanwla sa 8 saal ka ye bacha. Roads pe dhakke khata, chalny wali gariyon k maalkan se salwataien sunta. Hath aage phaila k kehta ‘sahab 5rupy de do’.. kabhi koi sahib 2 ya 5 ka sika pakra daite tw is ki kali ankhoon ki chamak mai izafa hojata.. Buhat se log hikarat se daikhte, kuch jan bachane k lye gari aage barha laite or kuch dant k or kuch bhaga daite.. Aisy he din guzar jata, sooraj ka bulb off hojata or gariyoun ki head lights on hojatien.. Aur wo main road se hat k apni kachi basti ko lout jata..
Mamool ka din tha.. maile kaproon or ujli ankhoon wala ye 8 saal ka bacha apne kad se ounchi gariyon k sheeshe saaf karta karta aik sham sheher mai lage ‘numaish’ mai pohanch gaya..
‘ahaa mela laga hai’.. ghareeb ka sahe.. par tha tou bacha!
oski chamkeeli ankhoon mai kayi sitaron ki roshni simat ayi.. wo kone mai khare ho k sari ronaq ko daikhta raha.. bache idhar udhar bhag rahe the.. ghoobary laine ki zid karte.. apni ammaon ka anchal pakar k khenchte hue zid karte hue, mujhe ye le k dainn.. na jane os waqat oske dil mai konsi or kitni khowahishat ne janam leya or dam tora.. Phir achanak uski nazar mickey mouse uncle pe pari.. bachon ko goud mai utha k tasweerain khinchwate hue, bachon ke galoon ko narmi se choote or pyar karte hue ache mickey mouse uncle.. woh baqi sara waqat bas mickey mouse uncle ko he daikhta raha.. kitne ache hain na, bacho se pyaar karne wale, bachon ko khush karne wale, unko hansane wale or unke sath photo khinchwane wale ache uncle..
Andheera chaa gaya.. Stalls simatne lage, ronakain kam hone lagein, ache mickey mouse uncle ghar jane lage.. Unho ne aik tent k bane room mai ja k apna costume change kiya.. aur apne ghar ki taraf rawana hue, chamakti ankhon wala bacha unke peche chal para.. wo sheher ki ronakon se nikal kar uski kachi basti jaisi he aik basti mai dakhil hue.. woh uncle k peche chalta raha.. us ne taqreeban bhag k bech ka fasla khatam kiya or uncle ki kameez k daman ko pakar liya..
‘uncle mjhe bhi goud mai lo na’ chamkili ankhon wale bache ne kaha..
‘abay pagal hai kya tu’—
‘uncle uncle.. mery sath bhi bataien karo na’—
‘abay chal bhag yahan se, nahe tu ek lagaun ga ulte hath ka’..
 uncle uncle.. mere baba ki tarha na bola.. tum tou ache ho..
Ttaaaaarrr… mickey mouse uncle ny jhinjla kar chamakti ankhon wale bache k gaal pe zanatee dar thapar raseed kiya..
‘pora din zaleel ho k a raha hun ye pagal peche par gaya hai’ os ne kheench k apna daman oski hath se churaya..
bachy ki ankhoon k sitare toot gaye.. wo apne gaal pe hath rakhe rakhe 2 qadam peche hata.. uncle uncle.. awaz mai baiyaqeeni the..
‘abay tu jata hai ya aik or dun’..
woh wahan sy 2 qadam or peche hata.. muraa or bech mai baghair kaheen thehre apne makan mai pohancha.. abba pehle ka aa chuka tha..
‘abay kahan tha itni dair tak, namak haram badmaash hota jar aha hai? Ttaaaaaaarrrr.. thapar ki awaz goonji the…                                  

1 comment:

  1. It has been long debated, or you can say that some columns have this firm believe that these street children conceal their real identity and there are mafia’s under which they are working. It is manifested that they don’t deserve the charity. However what I believe that despite of the fact the what ever their real identity is, we are no one to establish that the hand begging help deserves or not. As the real benefactor is the one who has created us and when we beg something from him, we never think that their might be people who deserve more then us. Although there is no doubt in the fact the begging has turned into a profession but still there are people like the one reflected by the writer in the story.

    ReplyDelete